പാപ്പിനിക്കാവ് ഉത്സവത്തിന് കൊടിയിറങ്ങി:

തവനൂർ: വാദ്യമേളങ്ങളും നാടൻകലാരൂപങ്ങൾ അണിനിരന്ന വരവുകളുമൊരുക്കിയ നിറക്കാഴ്ചകളോടെ ഒരാഴ്ച നീണ്ടുനിന്ന പാപ്പിനിക്കാവ് ക്ഷേത്രത്തിലെ മകരച്ചൊവ്വ ഉത്സവത്തിന് കൊടിയിറങ്ങി. രാവിലെ പ്രഭാതഭേരിയോടെയാണ് ചടങ്ങുകൾ തുടങ്ങിയത്. വിശേഷാൽ പൂജകൾക്കുപുറമേ പരമ്പ് വരവ്, കൊടിവരവ് എന്നിവയുണ്ടായി. ഉച്ചയ്ക്ക് ഗുരുതി തർപ്പണവും നടന്നു.

എഴുന്നള്ളിപ്പിന് പഞ്ചവാദ്യവും ആനയും അകമ്പടിയായി. വൈകീട്ട് കാളവേലയും വിവിധ കമ്മിറ്റികളുടെ വരവുകളും ഉത്സവാഘോഷത്തിന് മാറ്റുകൂട്ടി. വൈകീട്ട് ചൈനീസ് വെടികെട്ടും നടന്നു. കളംപൂജയ്ക്കുശേഷം പൂക്കാട്ടിരി വിജയരാഘവ പൊതുവാളും കലാ നിലയം രതീഷും ഇരട്ടത്തായമ്പക അവതരിപ്പിച്ചു. വെള്ളയിൽ മനയിൽനിന്ന് താലപ്പൊലി എഴുന്നള്ളിച്ചു. തൃശ്ശൂർ മുദ്ര തിയേറ്ററിന്റെ ‘ആട്ടം’ നാടകത്തോടെ ആഘോഷപരിപാടികൾ സമാപിച്ചു.