കളളൻ കവർന്നുപോയ തുക നാട്ടുകാർ സ്വരൂപിച്ചു നൽകി:

എടപ്പാൾ : മത്സ്യം വാങ്ങാൻ വന്ന വിരുതൻ കടക്കാരനെ കബളിപ്പിച്ച് കവർന്ന തുക നാട്ടുകാർ സ്വരൂപിച്ചു നൽകി കടക്കാരന്റെ ദുഃഖമകറ്റി. എടപ്പാൾ അങ്ങാടിയിലെ ഉണക്കമീൻ കച്ചവടക്കാരനായ മുഹമ്മദ് ബാങ്കിൽ അടയ്ക്കാൻ വെച്ചിരുന്ന പണമാണ് കഴിഞ്ഞ ദിവസം ഏതോ സാമൂഹ്യദ്രോഹി കവർന്നത്. നിത്യജീവിതം തള്ളിനീക്കാൻ തന്നെ പ്രയാസപ്പെട്ടിരുന്ന അദ്ദേഹം ഒരു പാട് നാളുകളായി ദിവസവും കിട്ടുന്ന കൂലിയിൽ നിന്നും മിച്ചം പിടിച്ച് 20,000 രൂപയാക്കി ബാങ്കിലടയ്ക്കാൻ വെച്ച തുക നഷ്ടപ്പെട്ടതോടെ വലിയ മാനസിക പ്രയാസത്തിലായിരുന്നു. അപ്രതീക്ഷിതമായി വന്നു ചേർന്ന അവസ്ഥയിൽ തളർന്നിരുന്ന അദ്ദേഹത്തിന് കൈത്താങ്ങായി എടപ്പാൾ പഞ്ചായത്തിലെ എട്ടാം വാർഡ് മെമ്പർ മുനീറ നാസർ മുന്നിട്ടിറങ്ങിയപ്പോൾ  വാർഡിലെ നാട്ടുകാരും, അങ്ങാടി സാംസ്കാരിക കേന്ദ്രം പ്രവർത്തകരും ഒത്തുചേർന്ന് ഒറ്റ ദിവസം കൊണ്ട് 20000 രൂപ സ്വരൂപിച്ച് മുനീറാ നാസർ, മജീദ് അമാന എന്നിവരുടെ നേതൃത്വത്തിൽ അദ്ദേഹത്തിന് കൈമാറി.