പന്നിയൂര്‍ പൊറ്റമ്മല്‍ തിരുകുറുമ്പക്കാവ് ഭഗവതി ക്ഷേത്രത്തിലെ താലപ്പൊലി മഹോത്സവം ആഘോഷിച്ചു:

ആനക്കര: നാടന്‍ കലാരൂപങ്ങളുടെ നിറവില്‍ പന്നിയൂര്‍ പൊറ്റമ്മല്‍ തിരുകുറുമ്പക്കാവ് ഭഗവതി ക്ഷേത്രത്തിലെ താലപ്പൊലി മഹോത്സവം ആഘോഷിച്ചു. രാവിലെ മുതല്‍ തന്നെ ദേവീ ദര്‍ശനം തേടി വള്ളുവനാടിന്റെ വിവിധ ഭാഗങ്ങളില്‍ നിന്നായി നൂറു കണക്കിന് സ്ത്രീകള്‍ ദേവിയെ വണങ്ങി കാണിക്ക സമര്‍പ്പിച്ചു. ദേവിയുടെ പ്രധാന വഴിപാടുകളിലൊന്നായ വെടി വഴിപാടുകളും കഴിപ്പിച്ചു. ഭഗവതിയാട്ടം, മൂക്കാന്‍ ചാത്തനാട്ടം, വൈകീട്ട് വിവിധ ദേശങ്ങളില്‍ നിന്നായി നാട്ടു വഴികളെ ധന്യമാക്കി താള വാദ്യ വിസ്മയം തീര്‍ത്ത് തിറ, കാള, പാണ്ടിമേളം, പൂതന്‍, തെയ്യം, കരിങ്കാളി, നാസിക്ക് ഡോള്‍, താംബോല എന്നിവയോടെ കൊടിവരവുകളെത്തി ദേവിയെ വണങ്ങിയതോടെ ക്ഷേത്ര പരിസരം ജന സാഗരമായി.

വൈകീട്ട് ദീപാരാധന, ക്ഷേത്രപാലകനാട്ടം, തുടര്‍ന്ന് മുല്ലപ്പന്തല്‍ അടക്കല്‍ ചടങ്ങോടെ ഉത്സവ പരിപാടികള്‍ക്ക് സമാപനമായി. ഇനി ഏഴാം ദിനത്തില്‍ മാത്രമേ മുല്ലപ്പന്തല്‍ തുറക്കുകയുള്ളൂ..