ആനപ്പൂരങ്ങളുടെ നിറക്കാഴ്ച്ചയായി ആമക്കാവ് പൂരം പെയ്തിറങ്ങി:

ആനക്കര : കൂറ്റനാട് ആമക്കാവ് ഭഗവതി ക്ഷേത്രത്തിലെ താലപ്പൊലി ആഘോഷിച്ചു. വളളുവനാട്ടിലെ പ്രസിദ്ധമായ താലപ്പൊലി ആഘോഷമാണിത്. പുലര്‍ച്ചെ മുതല്‍ തന്നെ നാടിന്റെ നാനാ ഭാഗങ്ങളില്‍ നിന്നായി ദേവീ ദര്‍ശനംതേടി നൂറ് കണക്കിന് ഭക്തരെത്തി.

രാവിലെ വിശേഷാല്‍ പൂജകളോടെ ഉത്സവ പരിപാടികള്‍ക്ക് തുടക്കമായി. 96 ദേശങ്ങളുടെ തട്ടകത്തമ്മയായ ആമക്കാവ് ഭഗവതി ക്ഷേത്രത്തിലെ താലപ്പൊലി ആഘോഷമാണിത്. പെരിങ്ങോട് എച്ച് എം സി കമ്മറ്റിയുടെ നേതൃത്വത്തില്‍ പെരുവനം കുട്ടന്‍ മാരാര്‍ ചെണ്ടമേളം. ദേവസ്വം കമ്മറ്റിയുടെ പൂരം പഞ്ചവാദ്യം, അഞ്ച് ആനകള്‍ എന്നിവയുടെ അകമ്പടിയോടെ മൂന്നു മണിമുതല്‍ അഞ്ചുമണിവരെ ക്ഷേത്രമുറ്റത്ത് എഴുന്നള്ളിപ്പ് നടന്നു.

ആമക്കാവ്, പെരിങ്ങോട്, മല, ന്യൂബസാര്‍, തൊഴുക്കാട്, വട്ടപ്പറമ്പ്, എരുമപ്പറമ്പ്, വട്ടേനാട്, നമ്മിണിപ്പറമ്പ്, മാത്തൂര്‍ തുടങ്ങി 96 ദേശങ്ങള്‍ പങ്കെടുത്ത കൂട്ടിയെഴുന്നള്ളിപ്പില്‍ തെച്ചിക്കോട്ടുകാവ് രാമചന്ദ്രന്‍, ചിറയ്ക്കല്‍ കാളിദാസന്‍, പുതുപ്പള്ളി കേശവന്‍, തെച്ചിക്കോട്ടുകാവ് ദേവീദാസന്‍, ഊട്ടോളി അനന്തന്‍, തിരുവമ്പാടി കണ്ണന്‍ തുടങ്ങിയ കേരളത്തിലെ തലയെടുപ്പുള്ള ഗജവീരർ അണിനിരന്നു.

ആനപ്പൂരങ്ങള്‍ ക്ഷേത്രത്തിൽ എത്തിയതോടെ താളവാദ്യ വിസ്മയം തീര്‍ത്ത് വിവിധ ദേശങ്ങളില്‍ നിന്നായി തെയ്യം, തകില്‍, ശിങ്കാരിമേളം, തിറയാട്ടം, കാവടി, കരിങ്കാളി, പൂതന്‍, സാംസ്‌കാരിക വേഷങ്ങള്‍ എന്നിവയുടെ അകമ്പടിയോടെ കൊടിവരവുകളെത്തി.

രാത്രി 9.30 ന് പെരിങ്ങോട് താഴത്തെ സെന്ററില്‍ സെക്കുലര്‍ പൂരാഘോഷ കമ്മറ്റിയുടെ നേതൃത്വത്തില്‍ ഡബില്‍ തായമ്പക, രാത്രിയില്‍ ക്ഷേത്രത്തില്‍ തായമ്പക, പുലര്‍ച്ചെ എഴുന്നള്ളിപ്പ് എന്നിവയോടെ 12 ദിവസം നീണ്ടു നിന്ന തോല്‍പ്പാവക്കൂത്തിന് ശ്രീരാമപട്ടാഭിഷേകത്തോടെ ഊരാളരുടെയും ദേശവാസികളുടെയും സമ്മതംവാങ്ങിച്ച് കൂറവലിച്ച് ഉല്‍സവത്തിന് സമാപനം കുറിച്ചു.