തെയ്യങ്ങാട് സ്കൂളിൽ പിടിഎ ജനറൽ ബോഡി യോഗം വിളിക്കണം; കോൺഗ്രസ്:

പൊന്നാനി: തെയ്യങ്ങാട് ഗവ: എൽ പി സ്കൂളിൽ ജോലി ചെയ്തിരുന്ന 5 അധ്യാപകരെ ഒരു കാരണവുമില്ലാതെ ഒഴിവാക്കിയ പിടിഎ കമ്മറ്റി തീരുമാനം പരിശോധിക്കണമെന്ന് ആവശ്യപ്പെട്ട് ഈഴുവത്തിരുത്തി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ തെയ്യങ്ങാട് സ്കൂൾ ഹെഡ് ടീച്ചർക്ക് പരാതി നൽകി. പൊന്നാനി താലൂക്കിൽ ഏറ്റവും നല്ല സ്കൂളായി പ്രവർത്തിക്കുന്ന തെയ്യങ്ങാട് സ്കൂളിൽ ചില രാഷ്ട്രീയ കക്ഷികളുടെ നിലപാട് സ്കൂളിന്റെ തകർച്ചക്കാണ് വഴിവെക്കുന്നത്. പത്തു വർഷത്തിലധികമായി ജോലി ചെയ്തിരുന്ന അധ്യാപകരെയാണ് മുന്നറിയിപ്പ് നോട്ടീസ് പോലും നൽകാതെ സ്കൂൾ തുറക്കുന്നതിന് രണ്ടുദിവസം മുൻപ് ഒഴിവാക്കിയത്. ഇതുകാരണം നിരവധി രക്ഷിതാക്കൾ ടി സി വാങ്ങി കുട്ടികളെ മറ്റ് സ്കൂളുകളിൽ ചേർക്കുന്നത് സ്കൂളിൻ്റെ നിലനിൽപ്പിനെ തന്നെ ബാധിക്കും.

നിരവധി പേർ ടി സി വാങ്ങി പോകുന്ന സാഹചര്യത്തിൽ അടിയന്തര പിടിഎ ജനറൽബോഡി യോഗം വിളിച്ച് സ്കൂളിന്റെ നിലനിൽപ്പിന് സംരക്ഷണം നൽകണമെന്നും, പുതിയതായി നിയമിച്ച അധ്യാപകരുടെ യോഗ്യതകളെ പറ്റി അന്വേഷണം നടത്തണമെന്നും ഈഴുവത്തിരുത്തി മണ്ഡലം കോൺഗ്രസ് കമ്മിറ്റി ആവശ്യപ്പെട്ടു. മണ്ഡലം പ്രസിഡണ്ട് എൻ പി നബീൽ, എ പവിത്രകുമാർ, ഉസ്മാൻ തെയ്യങ്ങാട്, കെ പി സോമൻ, ഫസലുറഹ്മാൻ, പിടി യൂസഫ് എന്നിവരുടെ നേതൃത്വത്തിലാണ് പരാതി നൽകിയത്.