സംസ്ഥാനപാതയോരത്തെ ഷെഡുകളും പുൽകാടുകളും നീക്കം ചെയ്യണമെന്ന ആവശ്യം ശക്തമാകുന്നു:

ചങ്ങരംകുളം: സംസ്ഥാനപാതയോരത്തെ ഷെഡുകളും പുൽകാടുകളും നീക്കം ചെയ്യണമെന്ന ആവശ്യം ശക്തമാകുന്നു. തിരക്കേറിയ കുറ്റിപ്പുറം തൃശ്ശൂർ സംസ്ഥാന പാതയിൽ ചങ്ങരംകുളം മുതൽ വളയംകുളം വരെയുള്ള പാതക്ക് ഇരുവശവുമാണ് അനധികൃതമായി കെട്ടിയുണ്ടാക്കിയ ഷെഡുകളും പുൽകാടുകളും കൊണ്ട് നിറഞ്ഞിരിക്കുന്നത്. കാൽനട യാത്രക്ക് പോലും കഴിയാത്ത രീതിയിൽ റോഡിലേക്ക് തള്ളി നിൽക്കുന്ന ഷെഡുകളും പുൽകാടുകളും വാഹനങ്ങൾക്ക് വലിയ ഭീഷണിയാവുന്നുണ്ട്.

പല സ്ഥലത്തും മാലിന്യങ്ങൾ നിറഞ്ഞ് ഡ്രൈനേജുകളും അടഞ്ഞ അവസ്ഥയിലാണ്. ഇത് മൂലം ശക്തമായ മഴ പെയ്താൽ പാതയോരം മുഴുവൻ വെള്ളക്കെട്ടിലാവുന്നതും പതിവ് കാഴ്ചയാണ്.

പാതയോരത്തെ മുന്നറിയിപ്പ് ബോഡുകളും ദിശാബോർഡുകളുമെല്ലാം വള്ളിച്ചെടികൾ നിറഞ്ഞ് യാത്രക്കാർക്ക് കാണാൻ കഴിയാത്ത രീതിയിൽ ആയിട്ട് വർഷങ്ങളായി. ഇവനീക്കം ചെയ്യാൻ പൊതുമരാമത്ത് വകുപ്പ് തയ്യാറാകണമെന്നാണ് നാട്ടുകാരുടെ ആവശ്യം.